கொஞ்சம் வலிகளைத் தவிர

கொஞ்சம் பெரியவர்கள்
பூமாதேவிக்காக
கோமணம் கட்டுவார்கள்
கிணற்றால் எங்களை
என்ன செய்துவிட முடியும்
கொஞ்சம் ஞாபகங்களைத் தவிர
மோட்டர் கொட்டாய் சொரவானம் ,
சூறாவாரி சொரவானம் ,
சாமி குதி, குட்டிக் கரணம் ,
காக்கா நீச்சம், படிக்கட்டு நீச்சம் ,
ஓரி, மண்ணெடுப்பு,
புடிக்கிற ஆட்டம்
சுமந்து திரிவதற்கு
கொஞ்சம் வலிகளைத் தவிர

புராண நெய் தடவி

ப்ளாஸ்டிக்கை
சமன் செய்யும் கந்தல்
கழிபட்ட தொலும்பு
வகுபடுதலின்றி
ஒப்பனையற்ற வெறுங் குழவி
மையமிழக்க
விரிந்த உருளை
இருதலைக் கூம்புகள்
மையவிலக்காய்ச் சுழன்றேகும்
மூப்பனின் தத்துவம்
குளக்கரைப் பாறைகள் ,
இருண்ட தெருமுனைகள்
ஓட்டத்தின் பரிச்சயமற்று
இடுதலும் , கட்டுதலும்
ஞாபக மறதியாய்
சண்டைகள் அற்று
திரை ஒளியில் தீபம்
வழிகிறது
புராண நெய் தடவி

சுதந்திரத்திற்காய்

பறிக்கப்பட்ட
உன் உரிமைகளெல்லாம்
பறிமுதல் செய்யப்பட்டது
மாட்சிமை தங்கியவர்கள்
பிட்ட உறவுக்கு
வாகாய்க் குனிந்த போது
உன் நிலத்தையும் , என் மகளையும்
அவர்களின் எஜமானர்களுக்கு
கூட்டிக்கொடுத்தால்
தேசபக்தர்களென வரலாற்றில்
பரப்பப் படுவோம்
அனுமதிக்கப் பட்ட பிறகே
எல்லா புணர்தல்களும்
நிகழ்த்தப்பட வேண்டும்
எல்லா குசுக்களின் ஓசையும்
கண்காணிக்கப்படல் வேண்டும்
சட்ட ஆணைகளுக்குட்பட
வேண்டுமென்பதால்
நனவிலிகளின் சிந்தனை
முடிவற்ற காலம் வரை
தொடர்ந்து கண்காணிக்கப்படும்
எல்லா தியாகங்களும்
மக்களால் செய்யப்படும்
மக்களின் சுதந்திரத்திற்காக

அந்த பட்டாம்பூச்சி பயணத்தை முடித்துக்கொண்டது

பூக்கள் முடிவற்றுக்
காத்திருந்த காலமொன்றில்
மிதிவண்டியின் கைப்பிடியிலும்
சீட்டிலும் அமர்ந்து பயணித்தோம்
சில மனிதர்கள் , மரங்கள்
வீடுகள் , வயல்கள்
சாலைகளைத் தாண்டி
ஒரு மதுச் சாலையருகில்
அந்த பட்டாம்பூச்சி
பயணத்தை முடித்துக் கொண்டது

வெறியாட்டுக்காய்

மௌனத்தின் ஒலியால்
வெளியெங்கும்
நிரப்பப் பட்டிருக்கும்
எலுமிச்சை எழுத்துக்கள்
y ஆல் எரிக்கப்பட்டு
பிரதியெங்கும்
அலைவுறும் கட்டளைகள்
வெறியாட்டுக்காய்

ஒரே படிக்கட்டில்

நீல நிறத் தென்னைகள்

செழித்திருந்தன

புத்தனும் கண்ணனும்

கிறங்கிக் கிடந்தனர்

கோணல் எழுத்துக்கள்

சுவரெங்கும் துளிர்த்தன

பொங்கல்வரை பூட்டி

வைத்திருக்கலாமெனத்

தோன்றுகிறது

மொழிதல்

வேறுவேறாய் மொழியப்பட்டது
எல்லோரும் ஒன்றையே
பேசியதாய்ச் சொன்னார்கள்
பேச்சின் முடிவில்
வலதிமை
நரம்பு விடைத்தது
ஒரே இரவில்
சாலை எப்படி நீண்டதெனத்
தெரியவில்லை

முதலையின் கண்கள்

எல்லைகள்
தவறித் திரியும்
நிலவின் வஞ்சகம்
நீ
சாக்குகளை அவிழ்த்தபோது
சுருட்டி எறிந்துவிட
இயலுமென்ற போதும்
இழைகளைச் சிதைக்கிறேன்
சிதைவின் வழியிறங்கும்
பசிக்காகவேனும் நீ
வேட்டைக்கு கிளம்பலாம்
ஏங்கிக் காத்திருக்கும்
அந்த
முதலையின் கண்கள்

கோலைக் கொடுத்த

மலம்

பகுத்தாயப் பட்ட பின்னும்

கண்காணிக்கப்படும் குசுக்கள்

வாழ்க்கை வழிகிறது

பாத்திரமற்று

சூரியகாந்திக்கு மேலும்

வேருக்கு கீழும்

ஐப்பசி மழையில்

கரைந்த சாம்பல்கள்

சாட்சியமாகிப் படியேறிச்

சென்றாலும்

கோலைக் கொடுத்த

தெய்வங்களின் உச்சாடனம்

விதிப்படிஎன்று

அடுத்த கோடைக்கு என்ன செய்வதெனத் தெரியவில்லை

ஆயத்தமாகும் குடிகாரனைப் போல

ஒவ்வொரு

விடுதி விடுமுறையின்

முந்தைய நாளும்

சென்ற கோடையில்

பெரியவளுக்கு

இரண்டு கரண்டியிழுப்பு

சின்னவளுக்கு ஒரு வடு

முறத்தில் கிழித்தது

கோடைக்குப் பிறகு

இரண்டு முறமும்

நாலைந்து துடைப்பமும்

வாங்கியதாகக் கேள்வி

தீபாவளிக்கு சின்னவள்

வர மறுத்து விட்டால்

அடுத்த கோடைக்கு

என்ன செய்வதெனத் தெரியவில்லை

கேட்கவே கூசுகிறது

எமனைப் புணர்ந்ததாய்ச்
சொல்வது ஈறாக
எல்லா புணர்தல் வசவுகளும்
பழைமையாகிப் போனதால்
வலை குப்பையில்
வசவு தேடினேன்
கி.பி. 2100 வாக்கில்
எல்லா புனர்தல் வசவுகளும்
காலாவதியாகிவிடும் என ஒரு தரவு
தெருச் சண்டைகளில்லாத
புணர்தல் வசவுகள் கேட்காத
தமிழர் ஊர்கள்
கேட்கவே கூசுகிறது

I.V. = 99/O.V. x 101/100

காற்றை கிழித் தோடும

அந்த தொடர்வண்டி

பார்வையின் வழி நகரும்

பிளாட்பார சுவர்

காலமும் , இடமும்

பொருளும் , பெயர்வும்

I.V. = 99/O.V. x 101/100

நாளை , மற்றுமொரு நாள்

வித்தியாசம் எனச் சொல்லி

விதிகள் மாற்றப் படலாம்

மயிலிறகு குட்டிகளுக்காய்

புத்தக இடுக்குகள்

கால இடைவெளிகள்

ஓயாத கதையாடல்கள்

மயிலிறகு குட்டிகளுக்காய்