தர்மசங்கடமான
அந்த மணித்தியாலம்
 சிறு நெருடல் தவிர்த்து மோசமானதாக இருக்கவில்லை
நீ தேவதையாகிப் போனாய்
நான் முட்டாளாகியிருக்க வேண்டும்
ஒரு மலரை உயர்த்தவோ
 தொடர்பை பரிமாறலோ
திராணியற்று பலவீனங்களால் ஆளப்படுபவன் நான்
கோர்வையற்ற உளறல்களுடன்
கோரிக்கை முன்வைப்பு மின்றி
இந்தக் கவிதையின்
 கடைசி வரிகளைப் போல்
முடிவற்றுத் தொடர்கிறேன்

கொம்புகளும் தீ நாக்குகளுமற்ற
 என்னை அசுரன் என்கிறாய்

விரிக்கப்பட்ட எல்லா கம்பளங்களும்
 பறக்கும் என்கிறாய்
உன்னை
 பயணிக்க வற்புறுத்தியதாக
 குற்றம் சாட்டுகிறாய்
ஆகவே
கம்பளம் விரிப்பதென்பது
 தவறென்றாகிறது

வெற்றியும் தோல்வியும்
 நாணய பக்கங்களென
 தர்க்கம் என்னை
 தகவமைத்திருக்கிறது

விசாரணைக்காக காத்திருப்பது
 என் வழக்கமல்ல 
உணரும்போதே சிலுவை சுமக்க
 தயாராக இருக்கிறேன்

ஏன் இப்படி
மோசமாக எழுதுகிறாயென
 கேள்விகள் முன்வைக்கப்படும் 

ஒருபோதும் நான்
 கவிதைகளை எழுதுவதேயில்லை
 கவிதைகள் தான் என்னை
எழுதிச் செல்கின்றன

ரசவாதமும் மாயக்கண்ணாடியும்
மந்திர ஜாலங்களுமற்ற
தட்டையான மனிதன் நான்

இயல்பிலில்லாத வெறுப்பை
என் பொருட்டு சுமக்க வேண்டாமென
 வேண்டுகோள் விடுக்கிறேன் .

காதலிப்பதற்கு
முட்டாளாய் இருக்க வேண்டும்
காதலிக்கப்படுவதற்கு
தேவதையாய் இருக்க வேண்டும்
எந்த ஒரு தேவதையும்
கருப்பாக இல்லாதது
மன்னிக்க முடியாத குற்றம்தான்
ஆனாலும் என்ன செய்ய
தேவதையைத்தான்
காதலிக்க வேண்டியுள்ளது

எத்திலி (முதல் தேவதை)
எட்டு வயதில் மரத்துண்டுகளுடன் விளையாடினோம்
10 ஆண்டுகளுக்கு பிறகு ஒரு சந்திப்பு
உரையாடலின்றி
ஈன்ற பிறகு
15 ஆண்டுகள் கழித்து ஒரு சந்திப்பபு
பிறகொரு சந்திப்பில்
சகஜமாய் பேசிக்கொண்டோம்

பீர்க்கங்காய் (அசலூர் தேவதை )
15 ஆண்டுகளுக்குப் பிறகும்
அதே ஒடிசலாய்
பூத்தபோதிருந்த
அதே ஒற்றை மூக்குத்தியுடன் மட்டும்
இன்னமும் அழகாய்
ஈன்று விட்டிருக்கக் கூடும்
ஞாபகத்திலிருந்து மீட்டு
பெயரை மாற்றிச் சொன்னாள்

குள்ளத்தாரா ( சொந்த ஊர் தேவதை )
20 ஆண்டுகளுக்குப் பிறகு ஒரு சடங்கில்
அடையாளம் தெரியவில்லை எனச் சொன்னாள்
வேகமாய்ப் பேசினாலும்
அதே சுயநலம் கண்களில்
ஏதாவது ஒரு சில சடங்குகளில் சந்திப்பதும் உண்டு

இச்சாதாரி (கடைசி தேவதை)
மஞ்சள் முகமும் உச்சி சடையுமாய்
ஒரு முறை என்னைப் பற்றி
இரண்டு வார்த்தைகள் பேசியிருக்கிறாள்
முப்பது ஆண்டுகளாய்க் காத்திருக்கிறேன்
9Dயை நினைவுபடுத்தி சொல்ல
ஒரு சந்திப்பு நிகழுமென 
மருத்துவமனை செல்ல இயலாதவனின்
கடவுள் நம்பிக்கையை போல
இச்சாதாரி ஒருநாள் பிரான்சிஸ்கா ஜான்சன் ஆகக் கூடுமென

அப்புறமென்ன
 நான் புத்திசாலியாகி  விட்டேன்